سياسة الخصوصية

«بليت» منصة تقدر السعر الاسترشادي للوحات المميزة في السوق السعودي. هذه الصفحة تشرح وش نجمع من بياناتك وليش وكيف نحميها، بلغة واضحة.

طلبات التقييم

حين تطلب تقييماً، نحفظ بيانات اللوحة اللي أدخلتها (الحروف والأرقام والنوع)، وعنوان IP بعد تجزئته (hash)، ونوع الجهاز التقريبي، لتشغيل الخدمة ومنع الإساءة.

عند إنشاء حساب

نحفظ رقم جوالك أو بريدك الإلكتروني المتحقق منه، وتقاريرك الصادرة، ورصيد باقتك، وجلسة دخول (كوكي أساسية للجلسة فقط، ما نتتبع بها مواقع أخرى).

الدفع

عملية الدفع تتم بالكامل عند مزود الدفع المرخص، وبياناتها مشفرة عندهم. بليت ما تخزن رقم بطاقتك أبداً، نحتفظ فقط برقم العملية وحالتها لإثبات الشراء.

حسابك في سوق بليت

لما تعرض لوحة أو تسوم، نحفظ رقم جوالك الموثق برمز، واسمك اللي توقّع به الإقرارات، وبيانات عرضك (الحروف والرقم والنوع والسعر والمدينة وإجابات الجاهزية)، وسوماتك ومفضلتك وطلبات «لوحة مطلوبة». وللزائر بدون حساب نحسب عدد صفحات العروض اللي فتحها بكوكي الجلسة، ونستخدم عنوان IP لحدود الاستخدام ومنع الجمع الآلي.

صورة الاستمارة

استمارة اللوحة وثيقة رسمية فيها بيانات شخصية، ونأخذ صورتها لغرض واحد: نتأكد أن اللوحة لك. تُقرأ الصورة آلياً لاستخراج الحروف والرقم، ويشوفها فريق مراجعة بليت فقط، وما تظهر بالسوق أبداً ولا للمشترين. تُحفظ على تخزين خاص ببليت ما يوصل له أحد برابط عام، ونحذفها آلياً بعد ٢١ يوماً من تسجيل عرضك، ويمددها التجديد ٢١ يوماً من تاريخه. وتقدر تطلب حذفها قبل ذلك بمراسلتنا. والصورة اللي ترسلها في واتساب ولا يكتمل بها عرض نحذفها بعد ٢٤ ساعة.

بوت واتساب

لما تراسل رقم واتساب بليت، نستقبل رسائلك عبر مزود واتساب أعمال معتمد. نحفظ جوالك وما تكتبه لبناء عرضك (الحروف والرقم والنوع والسعر والمدينة وإجابات الجاهزية واسمك للإقرار) في جلسة مؤقتة تُمسح بعد ٢٤ ساعة من آخر رسالة أو عند اكتمال العرض، والصورة كما في قسمها. والأرقام غير السعودية نتجاهلها ولا نرد عليها. الاستفسارات العامة تُجاب آلياً من معلومات بليت المعتمدة، وما لا يُجاب يتحول لفريقنا.

رسائل واتساب اللي نرسلها لك

نستخدم جوالك لرسائل خدمة مربوطة بفعلك في السوق، مثل: نشر عرضك أو رفضه بالسبب، السومات الجديدة على لوحتك (مع باقة الظهور الكامل)، واختيارك بـ«البيع له»، وما يستجد من إشعارات الصفقة. وفيه رسائل تسويقية: تنبيه «لوحة مطلوبة» لما تنزل لوحة تشبه طلبك، وتذكير بطلب تقييم واقف عند الدفع. كلمة «إيقاف» توقف الرسائل التسويقية فقط، وما توقف رسائل الخدمة المربوطة بعرضك أو سومتك لأنها جزء من الصفقة. وكلمة «إلغاء» أثناء حوار عرض اللوحة تلغي الحوار بس. ولإرجاع الرسائل التسويقية بعد إيقافها راسلنا.

وش يشوفه الطرف الثاني

للزوار والمشترين: اللوحة ونوعها والمدينة وإجابات الجاهزية وشارة «موثوق ✓» إن وجدت، والسعر وأعلى سومة وعددها. وأصحاب الجوال الموثق يشوفون سلّم السوم بأسماء «مزايد ١، مزايد ٢…» بلا أسماء حقيقية ولا أرقام. البائع يشوف مع كل سومة جوال صاحبها واسمه المسجل عندنا ورابط واتساب له، من لحظة السومة. وبعد «البيع له» يظهر جوال البائع للمشتري المختار، وجوال المشتري للبائع، مع رابط واتساب واتصال. وفيه صفحة عامة لكل لوحة معروضة تظهر في محركات البحث فيها اللوحة ونوعها والمدينة فقط، بلا سعر ولا أي بيانات عن البائع.

سجل الصفقة

نحفظ الإقرارات اللي توقّعها (اسمك وجوالك ونص الإقرار ووقته)، والسومات، وبلاغ الشراء وتأكيد البائع أو نفيه، ودفعات العمولة، وتعديل السعر. هذا السجل هو أساس شارة «موثوق ✓»، ومرجعنا لو صار خلاف على صفقة أو طلبته جهة رسمية مختصة بموجب النظام.

مزودون يعالجون بيانات السوق

قد تُعالج بعض البيانات لدى مزودي خدمات مرخصين لتشغيل الخدمة فقط، ولا يستخدمونها لأي غرض آخر.

حقوقك في السوق

نفس حقوقك الموضحة أدناه تنطبق على بيانات السوق: تطلع على بياناتك، وتصحح اسمك أو مدينتك، وتحذف صورة الاستمارة أو حسابك، وتوقف الرسائل التسويقية بكلمة «إيقاف». راسلنا وننفذ.

قياس الإعلانات

لو وصلتنا عن طريق إعلان، نقيس نتيجته عشان نعرف أي إعلان يفيد. ويُشارك مع مزوّد الإعلانات بيانات تقنية محدودة عن زيارتك وعن عملية الشراء، بلا اسمك ولا جوالك ولا بيانات لوحتك.

كم نحتفظ بالبيانات

بيانات حسابك وتقاريرك تبقى إلى حين تطلب حذف حسابك. عند الحذف نزيل بيانات تواصلك وجلساتك ورموز التحقق، وتبقى سجلات تدقيق مجزأة (ما تحوي بياناتك الأصلية) لأغراض الأمان.

حقوقك بموجب نظام حماية البيانات الشخصية (PDPL)

لك الحق في الاطلاع على بياناتك، وتصحيحها، وحذفها، وسحب موافقتك في أي وقت، راسلنا وننفذ طلبك.

وش ما نسويه

ما نبيع بياناتك، وما نشاركها مع معلنين، وما نعرض لوحاتك أو تقاريرك لأي طرف ثالث. بليت ما تنشر لوحة أحد من نفسها: اللي يعرض لوحته للبيع هو أنت، لما ترفعها بنفسك في سوق بليت، وعندها تصير ظاهرة للناس بإرادتك، وبيانات تواصلك تنكشف بالحدود الموضحة في قسم «وش يشوفه الطرف الثاني».

لأي سؤال أو طلب، راسلنا على info@baleet.com، نرد خلال يوم عمل.